عِشرة بوابتك للحياه
انتشرت مؤخرا كثيرا من الأقاويل حول أن مصطلح”سنجل مام”سئ السمعة ووصفه البعض بأن من تحملة هي إمرأة انجبت طفلا غير شرعي ..
بداية أحب أن أعرفكم معنى المصطلح عالميا ومترجما عن اللغة الانجليزية
”سنجل ماذر” هي
الام التى لديها طفل او اطفال يعتمدون عليها والتى تكون ارملة او مطلقة او غير متزوجة.. كأم وحيدة فقد ضحت باستقلاليتها المادية والاجتماعية من اجلهم
السنجل مام او داد هى/هو الشخص الوحيد الذى يتحمل المسئولية اليومية لتربية طفل او اطفال. والام هى عادة مصدر الرعاية الرئيسى فى مثل هذا الهيكل الاسرى الذى نشأ نتيجة لوفاة الاب او الطلاق او التلقيح الصناعى او الحمل الغير مخطط له
يعنى داخل من ضمن التعريف الارملة والمطلقة والحمدلله، يعنى مش معناها بالضرورة حمل غير شرعى او دعوة للدعارة او التحريض على الرزيلة والحمدلله يا فضيلة المفتى.
طب نيجى بقى للتعريف المصرى واللى اتشرف انا نرمين ابوسالم مؤسسة جروب” اجيبشن سنجل مامز “او ” امهات مصر المعيلات” بوضعه
هى الام المعيلة المطحونة الكادحة الشقيانة على اكل عيش ولادها اللى ابوهم مات او طلقها او غاب لاى سبب ما واللى جايباهم بالحلال مش بالرذيلة ولا عن طريق بيوت الدعارة.. ولقت نفسها فجأة لابسه فى الحيط مسئولة عن ارواح عن تربية اطفال، عن اسرة باكملها مسئولية مادية ونفسية وتربوية واجتماعية لوحدها فى مجتمع اقل ما يمكن ان نشبه به بالغابة وفى ظل ضغوط مادية ومعنوية ومجتمعية طاحنة لا قانون بيدعمها ولا سياسات بتدعمها ولا مجتمع بيدعمها على الاقل بس عشان العيال الغلابة اللى بتجرى عليهم لوحدها
هى الام اللى متمرمطة فى المحاكم عشان تجيب حقوقهم المادية عشان ياكلوا ويشربوا ويدخلوا مدارس واللى الاب فى اغلب الاحوال فى حالة وجوده على قيد الحياة خالع منها بدل مايتشردوا ولا بدل هى ماتنحرف عشان تجيب فلوس تصرف عليهم عشان ساعتها نبقى ان شاء الله نربطها بالدعارة والرزيلة عن حق
هى الام اللى بتواجة مجتمع ذكورى عنده ازدواجية معايير فيه معظم الرجالة مش شايفينها غير انها واحدة ست لا ينظروا ليها الا بشهوة الرجل والمفروض انها ضعيفة ومنهارة وواقعة فى عرض واحد فيهم وغيرهم شايفين انها فرز تانى او معيوبة وهما بذات نفسهم ممكن يكون عندهم فى العيلة واحدة واكتر بظروفها
هى اللى مش شايفه لا ادول ولادول وصاحية من النجمة جري على الشغل وجري على المدارس وجري على التمارين وجري على الدروس وجري على طلبات الاولاد وجري على الدكاترة والمستشفيات وجري على المحاكم وجري على المحامى وجري على الشغل التانى ماهو اصل وظيفة واحدة ماتقضيش وجري تحمى نفسها من ده وتحارب هنا وهناك بس عشان تعيش هى وولادها
#سنجل مام وأفتخر
صوتنا بيوصل يا نرمين