عِشرة بوابتك للحياه
الاحتياج للشَوَفان
علشان تتشاف مهم تتكلم
الشَوَفان محتاج اوى انفتاح و صراحة ووضوح و دا من بداية العلاقة
يعنى كل واحد فيهم بيتكلم كويس و بيعبر عن نفسه كويس و التانى مهتم و بيسمع
واحد بيتكلم من غير زواق
و من غير ماسكات
و بيبقى على طبيعته
و التانى بيشوف و يسمع و يفهم
ساعات كتير كلامنا بيكون غير حقيقتنا خالص من غير ما نحس نهائى ..
نكون بنتكلم عن الصورة الى بنحب الناس تشوفنا بيها
او بنتكلم بطريقة مثالية لاتعكس ابدا حقيقتنا
الموضوع دا للاسف ساعات بيكون بشكل لا ارادى تماما بهدف انى اعجب الى أدامى
او اديله صورة مثالية مخالفة لحقيقتى
و ساعات أقل بيبقى مقصود بهدف الخداع
بس النتيجة ان محدش بيشوف حقيقتك
و تلاقى تصرفاتك خلاف كلامك
فدا بيعمل ارتباك عند الاخرين
انت مين فيهم …الكلام و الا الافعال ؟
و دا بيخليك تحس دايما انك مش متشاف و مش مفهوم و لا مقبول و حد حاسس بيك
لما بتتكلم بيبدأ التانى يفهمك و يعرف افكارك و مشاعرك و مشاكلك و عقدك و ماضيك و احلامك و اهتماماتك
بيبدأ يشوفك زى ماانت ( من غير احكام )
و احط ميت خط تحت ( من غير احكام دى )
بيبدأ يكتشف فيك الجميل الى جواك و الى يمكن انت نفسك ماتعرفوش
و لا حد شافه فيك قبل كدة و لا قالك عليه
بيبدأ يشوف قدراتك و ملكاتك الى بتميزك
و الى يمكن ماتكونش عارفها و لا حد قالك عليها قبل كدة
بيبدأ يشوف حتى نقاط ضعفك و بينبهك ليها و يساعدك تقويها من غير احكام
و مش كدة بس
دا ممكن يشجعك دايما على التطور و النمو
و يساعدك و يحاول يبقى معاك دايما فى تحقيق نجاحات فى الحياة
و يبقى جنبك و معاك و شايف مشاعرك و فاهمها و حاسس بيها فى لحظات الفشل و الوقوع و الألم
انا اظن ان العلاقة دى لما تكون متبادلة ..حاجة خيالية
بنشوفها اكتر من طرف تجاه الاخر ..يعنى فى اتجاه واحد بس
مش بيقولوا وراء كل عظيم امرأة
الشَوَفان جميل و كلنا محتاجينه فى طريق النمو و النضج الذاتى
و مش لازم ابدا تلاقيه فى شريك حياتك ممكن تلاقيه فى اى علاقة
احد الوالدين او أخ او صديق او حتى معالج نفسى لو الدنيا زنقت
و قبل ما تعد تمصمص شفايفك و تندب حظك ان مفيش فى حياتك حد كدة
اسأل نفسك هل انا بعمل كدة مع حد و شايفه ؟
