عِشرة بوابتك للحياه
العمر حرامى بيسرقنا
أيام و سنين بتفرقنا
و هموم شلناها أمَّا غرقنا
لا شكينا و لا حتى ارتحنا
لفينا الدنيا و بتجيبنا
شرقها غربها و يَّا نصيبنا
تقلب وشها لما تصيبنا
و بنرجع أول ما بدأنا
نحايلها برضه مفيش فايدة
عمايلها معانا نار قايدة
من غير لا فصاحة و لا مزايدة
أحيانا تيجى و تنصحنا
فرحة و سعادة تصبحنا
لو نغفل حبة تصحصحنا
و سنين بتطلَّع أرواحنا
بعذاب و مرار بتمرجحنا
و نخبى و عينا بتفضحنا
و كإن لا جينا و لا رحنا
و تاخدنا ساعات و تمطوحنا
تضايقنا و تكتم مراوحنا
بس احنا عارفين مصالحنا
و توكالنا على الله مريَّحنا
