عِشرة بوابتك للحياه
سألت : هل ينجح الجواز القائم على الاحتياج ؟
٩٩٠٩٪ من الجوازات قائمة على الاحتياج
و الى احنا بنقول عليه حب و لكنه ليس بحب
لان الحب فى مفهومه الناضج الرغبة العميقة فى رفاهية و سعادة و نجاح الآخر دون انتظار المقابل
و دى حاجة نادرة الوجود فى الوجود فى التعامل البشرى
حتى فى تعاملنا مع اولادنا
احنا بنحب اكتر الابن المطيع او الابن الشاطر او الابن المهذب او الحنون على حسب احتياجنا احنا منه …
اذن دا مش حب بمعناه الناضج
الحب الناضج انى بحبه حتى لو غبى او متمرد او قاسى
و مش عيب و لا غلط ان الجواز يقوم على الاحتياج
لاننا كلنا فى الغالب محتاجين جدا لبعض و خاصة فى المرحلة السنية الى احنا بنتجوز فيها
و ينجح الزواج بشكل رائع لما الاتنين يلبوا احتياجات بعض
بيبقوا فاهمين نفسهم كويس
فاهمين احتياجهم
و بيعبروا عنها بشكل صريح علشان التانى يفهمه
و الطرف التانى بيتقبله و يفهمه و يفهم مدى اهمية هذا الامر و يسعى الى تلبيته و اشباعه لدى الاخر
و تستمر العلاقة كدة طالما ان تلبية احتياجات الاتنين متبادلة و محترمة و مقدرة
مشكلة الجواز دا ان لو حصل تقصير فى أى من هذه الاحتياجات بيحصل تذمر و استياء و ألم
يعنى الى متجوزة واحد علشان عندها اولى احتياجها الى الاهتمام
و التانى يهملها و ينشغل عنها بأكل العيش او الاصدقاء او الاهل او اى من مسئولياته الاخرى دون احداث توازن جيد و اهتمام يشبعها
دا هيخليها تستاء و تتذمر و تيجى الخواطر فى مخها طب انا اتجوزت ليه
و الى متجوز واحدة علشان احتياجه للجنس
و بعدين تيجى عندها الدورة الشهرية طويلة حبة
ولا يحصل لها حمل منذر
و لا تطول فى النفاس
ولا يجيلها اكتئاب حمل
و لا يحصل اى حاجة تمنع الموضوع هتلاقيه دايما قرفان منها و مستاء و متغير ناحيتها لان احتياجه مش متلبى
و تخليه يضرب نفسه ميت جزمة انا ليه اتجوزت ؟
الجواز علشان ينجح محتاج اننا نبذل قصارى جهدنا فى تلبية احتياجات الآخر
و فى نفس الوقت لو حصل اى تقصير وقتى نحترم ألمنا و نعرف سببه تحديدا بدل مانعد نخبط يمين و شمال و احنا مش فاهمين ليه قرفانين
و نحاول نلتمس العذر للآخر طالما الامر وقتى و غير متعمد
لكن المشكلة الكبرى بتحصل لما يكون فيه عدم تقدير لاحتياجات الاخر و عدم فهم لمدى اهمية هذا الامر ليه
و الموضوع بيطول
دا بيعمل تراكم للألم لحد ما بيحصل الانفجار بثورات مستمرة تؤدى الى الانفصال العاطفى او الطلاق
فى الحالة دى ممكن يستمر الزواج لكنه ما بيبقاش جواز سعيد طبعا
و فى الزمن الحالى بيبقى كل واحد فيهم عرضة لاى طرف ثالث يقدم له مايحتاجه فينجذب ليه و تبدأ مشاكل اكبر
علشان كدة بنقول للشباب من الجنسين
العلاقة الزوجية مش هى الماديات
مهم اوى تفهموا بعض احتياجاتكوا النفسية من الطرف التانى قبل ما تتجوزوا
و تفهموا انتوا اصلا يعنى ايه احتياجات نفسية و اهم احتياجاتكم
و مهم جدا ترفعوا من قيمة هذه الاحتياجات
و تحطوها كأولويات لتكوين العلاقة
فى الصورة دى اهم الاحتياجات النفسية الى كلنا محتاجينها كل واحد فينا محتاج تلاتة اربعة منهم كاولويات
حاول تفهم نفسك و تفهم احتياجاتك علشان تقدر تفهم الطرف الاخر ما تحتاجه اولا
