الرئيسية / مقالات / هنيده يوسف تكتب …جمايل مابعد الزواج …!!

هنيده يوسف تكتب …جمايل مابعد الزواج …!!

نص المتجوزين مستحملين بعض بس علشان الأولاد, يعنى اتنين عايشين تحت سقف واحد كل واحد فاهم انه عامل جميل في التاني وكاتم في قلبه وشايل, طب ودى تبقى حياة, لما كل واحد بمجرد ما بيدي ضهره لتاني يحبس دمعه من عنيه

عشان كده هتلاقي اللى ماتجوزش محسود من اللى اتجوز وبيقوله إنت كده أحسن, مع إن اللى مش متجوز فاكر انه بيقوله كده علشان يخزى عنه العين.

اتنين مستحملين بعض علشان الولاد, معناها إن كل واحد قبل الجواز كان بيشوف حاجات في الثاني مش عجباه بس قال إن الجواز هيغيرها, ده طبعا بمساعدة الناس الجميلة اللى كانت بتقول نفس الجملة اصبر أو اصبري هيتغير بعد الجواز, وهى هى نفس الناس اللى لما تيجي تشكليهم من الجواز تقول الرجالة كلها كده, الستات كلها كده, الجواز أصلا كده.

#ملحوظة: ماحدش بيتغير بعد الجواز؟ ولو حصل هيكون تغير للاسوأ .

ماينفعش اختيارك لشخص هتعيش معاه باقى حياتك, يكون ناقصه احساسك بالراحه الكاملة, بسبب انكم بتكملوا بعض مش شبه بعض, الحياة صعبة جدا, ومسؤولية الجواز كبيرة وكل يوم بتكبر اكتر من اليوم اللى قبله, ف لو كل طرف مش بيكمل التاني, هتفضل المسئولية مالهاش أب شرعى تنتسب ليه علشان كل واحد هيشوف ان التاني مش قادر يحس بيه وسايبه غرقان لوحده, وماينفعش ما يكونوش فاهمين إن الأولاد اللى هيخلفوهم هم نتاج لحظات حب بينهم, مش مجرد غلطة وتوريطة وهم ادبسوا وخلاص.

الملل بتاع الجواز أصعب ملل ممكن تعيشه في حياتك, بسبب فكرة إن كل طرف حس إنه جاب آخر التاني, وشاف منه حاجات مستحيل كان يشوفها لو ماكنش حصل جواز, عشان كده لازم تختاروا الناس اللى هتكملوا معاهم حياتكم بعناية شديدة, وتتكلموا معاهم في الوحش قبل الحلو, الجواز الأصل فيه انه يعمل استقرار وهدوء وسلام نفسي لطرفين, اللى بيها يقدروا يطوروا من نفسهم ويكونوا احسن من أي وقت كانوا فيه قبل الجواز, علشان فيه حب والحب بيخلق أفكار تقضى على اى ملل, لان اللى بيحب بيكون كل همه, وهدفه ازاى يرضى اللى بيحبه, عامله زي الشركه ومن شروط الشركه هي حسن سير وسلوك واخلاص النيه بين اطرفها.

ربنا لما وصف الجواز قال
(وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآَيَاتٍ لِقَوْمٍ يَتَفَكَّرُونَ)
مودة تقربهم من بعض, يخافوا على بعض, يحسوا ببعض, دايما في شوق باستمرار, المودة أصل الحب, والرحمة مراعاة الإختلاف بين الجنسين, والتماس الاعذار, والعقل في التصرفات مش الهمجية والصوت العالي والخناق, دى الحياة الناجحه اللى قوامها الحب المستمر .

لو هتتجوزوا علشان كلام الناس ماتجوزوش
لو خوف إن القطر يعدي خليه يعدي, بدل حياتك ما تتحول لحالة ندم, على شبابك وعمرك اللى ضاع, ده غير أحلامك وأمانيك إن الزمن يرجع بيك لورا,علشان ماتتكررش الغلطة دى.
لو هتتجوزوا من غير ما تكونوا بتكملوا بعض ماتجوزوش

أطفالكم لازم يكونوا نتاج علاقة حب, علشان يطلعوا من غير عقد, وأخيرا إنت بتجوز علشان تخش دنيا يبقى لازم تكون ؛حلى دنيا, ولو مش حاسس ده خليك في دنيتك لحد ربنا ما يكرمك ويبعتلك اللى يقدرك.

عن admin

شاهد أيضاً

الإعلامية كريمة أبو العينين تكتب.. صانع الأحزان..!!

يوما سألها بماذا تصفينى فقالت له انت صانع الاحزان بلا منازع . وصفها كان صادما …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *