الرئيسية / مقالات / هبه المغربي تكتب..حبينا بعض…!!!

هبه المغربي تكتب..حبينا بعض…!!!

حبينا بعض و كبرنا سوا ، اتغيرنا سوا و خوفنا سوا،، شوفنا الوجع الوان كان فيه احزان، طلعنا من جواه انسان عايز يخرج للنور فرحان، الحب كان علامة بينا و كان هو اللي مميزنا ، كان كل حركة و كلمة طالعة من جوا قلوبنا، كنا مكشوفين عريانين زي الطفل اللي مدفي بحنان الام ، الام اللي كانت شابة صغيرة طالع من جواها الحب، باين في كل كلمة بتقولها و كل حركة بتعملها، باين في كل نظرة من عيونها.

حبك من قلبك طالع ينور قلوب الحبايب، حبك و قلبك صادق متمسك بولاءك لوعدك ، وعدك اللي وعدتيه ليكي و لاهلك اللي هما اصلا مش من دمك،، احساسهم بيكي اداهم الامان و الدفا و الحنان، خلاهم يتكلموا و يعبروا و ينسوا الاحزان ، حبيناكي و حبينا بعض من غير اي شروط و لا احكام ، من غير اي حساب للي كان او للي جي يا اجمل انسان ، فيكي دفا و حب طالع من القلب يملي المكان ، خلتينا نفهم يعني ايه احتواء و يعني ايه نطلع من الاحزان.

اتمسكنا ببعض فوق الوصف و الخيال،زعلنا و خوفنا و كمان اُحبطنا زعلنا من الايام و علي الايام زعلنا من الزمن و من الاحزان و من كل لحظة اتوجعنا فينا و عرفتي انتي تطلعيها و عرفتي ازاي كمان تداويها ،،من كتر ماحبناكي و حبينا دفاكي عرفنا نحب بعض و صعبنا كمان علي بعض ، قلبك كان بيعيط قبل عنيكي و الله كنت حاسة بيكي..

قلبي بكي عليكي و علي فراق احباب كأني اعرفهم من ازمان مش زمن واحد فات، حسيت بوجع في قلبي اني بفارق اهلي و حبايبي، من اصغر واحد لأكبرهم..!!

بدأنا مشوار كبير و مش كبير طويل و مش طويل حزين و مش حزين مكسور و في نفس الوقت مجبور، مجبور خاطره لأجل حبايبه،، بداية حياة جديدة و نور طالع من القلوب عايز ينور قلوب كتيرة ممكن تكون حزينة و عنيدة تفتح تشوف، بس انتي علمتينا ازاي نكون انسان رؤوف…

حبيبتي عيونك قالت كتيير دموعك اللي نزلت علي خدك تسيل علمتني انا بالذات حاجات كتيير ،، بحبك يا سوزي يا قلب و كبير بحبك و عمري ما حنسي نظرة عيونك اللي علمتني كتيير ..

حبيتكوا كلكوا كتيير حتي لو ماكنتش قربت من قلوبكم بس شوفت في عيونكم كلام و حاجات كتيير ، وجودكم جنبي ووجودي معاكوا اداني دافعة لحاجات كتيير يا رب اكون انا كمان أثرت في حد فيكم يا احلي ناس و احلي قلوب مهما شوفت كتيير …

قلبي بيقولكم بحبكم و حتوحشوني اوي ، جوايا وجع ممزوج بحب و دموع و فرح ، بس عندي امل اني حشوفكم تاني كتيير ، بتمني لكل واحد فيكوا حياة هادية و بداية جميلة لحاجة هو فعلا نفسه فيها ، بتمني كمان صفاء للنفس و راحة للقلب و تتحققوا كل امانيكوا و تقدروا تساعدوا اقرب الناس ليكوا،، بحبكوا بجد من جوا القلب، حتوحشوني اوي بجد …

عن admin

شاهد أيضاً

الإعلامية كريمة أبو العينين تكتب.. وكان ليه..!!!

عشرون عاما بعد موته وهو لاينسى لحظة حضور ملك الموت وترجيه له بان يتركه للحياة …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *