الرئيسية / مقالات / هبه المغربي تكتب …أيوه كورونا..!!

هبه المغربي تكتب …أيوه كورونا..!!

قالك كورونا ، ايوه كورونا ، دي شيكولاتة دي والا ايه، طب وصفها مثلا زي ايه..!!!

طب بتروح فين ولا فين ، طب هي وصفة ولا اجيبها منين !!
طب حد يفهمني من عند مين و عايزة ايه..!!!

طب حد يشاورلي عليها من بعيد و انا مش حاقول و اعيد .
مش حفتح بقي ولا عايزة افهم بالتفاصيل، طب خلاص تعالي اقولك بالتفصيل، شكلك زهقت و باين عليك كدة خفت، لا ارجع تاني اهدي كدة و فكر بس في صمت..

امسك نفسك من غير فرك..
عيا او يمكن فيروس او حتي حاجة طالعة من الفانوس، او خبطة معلم خايب ماعرفش يحسبها ويخطط لحدوثها ، او حتة زعل بين اكبر و اشرس خلبوس بينا موجود …
اوعي تفكر و تقول اصل ربك زعلان او من رحمته منعك و بيديك دروس ..

لا بلاش تفكر بالمقلوب، فكر فيها بطريقة ربك المعبود الرحيم الكريم اللي مايحطش عبده في كابوس و يسيبه كده جوا خوفه ووجعه محبوس و جوا اوجاع و اوهام تاكل فيك ماترحم و لا تخليك تنام…

لا لا فكر فيها انها طريقة يجيبك بيها و يقربك منه و يجيبك عنده ، فكر فيها انها رحمة منه على ناس تانية كانت محتاجة امان و اطمئان ، ناس كانت محتاجة تحس بطعم الحياة الحقيقية اللي عايشاها جواها في كتمان..

ناس عايشة عيشة مش حاسة ولا بأهميتها و لا حتي لو سابتها، ناس اخدتها حق كدة منها و ليها ، حق كدة زي ماتقول خلاك مش حاسس بيها…

ولا في حلاوتها و لا حتي في سخافتها، كل تفاصيلها عيشتها او حتعيشها كنت محتاج تشوفها ، كنت محتاج تحس انك بعدت اوي عنها و عن احاسيسها، كنت محتاج تحس ان اي سعادة و اي فرحة عمرها ماكانت حتيجي لو مش عايشها…

لو مش عايش تفاصيلها الصغيرة اللي الحياة اخدتك منها و لهتك عن اهميتها، اه والله اهميتها، اصلك من غير ماتشوفها دلوقتي بحلاوتها و تقرب من كل حد كان محتاجلك و يحس بوجودك و تحسه حتي في قسوتها ، كان حيفوتك والله كتير و انت كنت بدأت تبعد عن اصل حياتك اللي بنيتها..

كنت حتفضل تبعد بعيد اوي و ساعتها رجوعك كان حيكون صعب علي ابطال قصتها..
عرفت بقي ليه ربنا ابتلاك بحاجة فيها شقاء لناس كان كاتب لهم فيها الانتهاء و ناس تانية كانت كاتب لهم فيها الاسترجاع..

استرجاع حاجات لو كانت راحت مع الوباء كانت صعب اوي ترجعها بعد زوال البلاء، يارب تكون وصلتك رسالة ربنا ليك و تفهم منه عايزك تحس ازاي جمال حياتك انت و احلي ناس في حياتك و تكون حسيت بأبسط احتياجاتك انها كانت نعمة زوالها هو كان النقمة …

الحمدلله يارب فهمنا انك طلعت الخير من الشر ووصلتنا لاحاسيس كنا بدأنا نفقدها وسط حياة كلها كوابيس ، حسينا قد ايه احنا في نعمة من اول انك تصحى في صحة و نعمة لغاية انك تنزل تمارس حياتك اللي المفروض تكون طبيعية بإيدك مش بإيديه..

عن admin

شاهد أيضاً

الإعلامية كريمة أبو العينين تكتب.. بإسم الدين اتفرقنا…!!!

لقاء غير مرتب ، تصادم بها فى طريقه وهو متعثر الخطوات حزينا منكسرا من أقرب …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *