الرئيسية / مقالات / نيرمين أبو سالم تكتب..هيشهد علينا الزمان..!!!

نيرمين أبو سالم تكتب..هيشهد علينا الزمان..!!!

هيشهد علينا الزمان
اننا مجدنا المهرجان
وعملنا “لبنت الجيران” قيمة
ورقصنا على “كوكتيل نسوان”
وقضيناها ما بين كافيه وسيما
وكلشين كان سميناه فنان


هيشهد علينا الزمان
ان البت عبلة الهبلة
كان حلمها تبقى بلوجر جامدة
تهب علينا كل يوم هابة
بالجزمة والحزام والشنطة
وتقولينا عالطقم السنيه
اللى لبسته فى الديفيله
ونوع الروچ اللى حاطاه
وهى بتعمل بوز البطة

والواد عماد الهباد
كل يوم يهبدله هبده
ياكل دماغ الناس الفاضية
اللى قاطعة عالسوشال ميديا
وبالمرة يعمله سبوبة
ويلملوا قرشين من اليوتيوبا
والناس ياعينى مصدقاه
مالهبد بقى اسلوب حياه

هيشهد علينا الزمان
اننا نسينا نفسنا
وعشان ماتش كورة موتنا بعضنا
وعشانه الباشا طلق المدام
وعشانه ضيعنا الآدان
وعشانه خسرتك ياصاحبى
تغور لو جبت فينا اجوان

هيشهد علينا الزمان
لمًا طلّعنا ناس ماتسواش سابع سما
ودكتور بهجت عالم الفيروسات
لما عدا من جنبنا
قولناله روح اعملك حاجة مفيدة
بدل ابحاث السارس والكوڤيدا
طب ليه كدة بس.. ليه؟
مش كفاية بياخد تلاتة جنية؟!
هتبقوا انتوا والزمن عليه؟!

والnurse نادية اللى مطبقة شفتين
اتنطنطنا عليها تنطيطين
بتتشطروا عليها وناسيين
انها ماشفتش ولادها بقالها يومين
طب نسينا ان ال nurse نادية
من غيرها ماكناش خدنا الكانيولا
من غيرها ماكناش اتدوينا
ولا روحنا بيتنا بعد ماخفينا

هيشهد علينا الزمان
ان ابو عزة اغتصب بنته
والواد ايبك بيسب امه
وأبوه بيتكلم فى عرضه
واخوه مش عارفين يسجلوه
عشان البيه الوالد بيهرب منه
وطالع يتنكر لنسبه

هيشهد علينا الزمان
على رحمة اتنزعت من قلبنا
وجورنا على حقوق بعضنا
واللى نسيوا وجود ربنا
واللى فجروا فى الخصومة
عشان ال ايه
بنجيب حقنا!!!

عن admin

شاهد أيضاً

الإعلامية كريمة أبو العينين تكتب …الظالمون بإسم الدين..!!

منذ صغر سنه والكل يشهد له بالذكاء والفطنة وسرعة البديهة . كان محور حديث كل …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *