الرئيسية / مقالات / رانيا شكري تكتب … جوع القلب كافر “فكر اوي قبل ما تقول انا بحب “

رانيا شكري تكتب … جوع القلب كافر “فكر اوي قبل ما تقول انا بحب “

كتير بنسمع ونقرا كلام ونصايح بتقولنا بلاش تختاروا اللي بتحبوهم وانتوا بيحرككوا احتياج شديد لعلاقه علشان الوحده او الخوف من المستقبل او حتى الملل علشان اختياركوا وقتها هيبقى معيوب ومش موضوعي .

مفيش حد جعان بيفكر في طعم الاكل حلو او وحش. هو محتاج ياكل فبياكل اللي ادامه علشان يملي معدته ويسد احتياج الجوع.

لكن لو انت نص جعان بتبدأ تفكر في طعم الاكل وطريقة تقديمه ومبتختارش غير اللي عاجبك بجد وعايز تجربه…. بتاخد بالك من كل تفاصيله علشان انت مش جعان اوي ومش هيحصل حاجة لو استنيت شوية و مكلتش…..مفيش احتياج ضاغط عليك وبطنك مش فاضية وعايزة تتملي باي حاجة.

اهه نفس الكلام ده بيسري علي قلوبنا….لما بتبقي فاضية وحاسة بوحدة…. لما الهوا البارد بيبقي داخلها من كل اتجاه وحاسس بفراغ وبرد عاطفي…محتاج دفا وونس .

بتبدأ قلوبنا تقبل باي حد علشان تسدد الاحتياجات دي لان جوع القلب كافر زي جوع المعدة . ……مبيفكرش ولا حتي بيحس بجمال وطعم الحب.

هو عايز يملى وخلاص.

بيملاه بأي حد حتي لو الحد ده بيأذيك ، حتي لو الحد ده في اختيار حر من غير احتياج ….عمرك ما هتفكر فيه.

ولو عقلك حاول يفرملك ، الرد معروف ” انا مش عايز ابقي لوحدي” الرد ده دليلك علي فشل القصة اللي انت فيها. دليلك انك بتسد خانة وخلاص.

اللي بيحب مبيخافش من الوحدة، اللي بيحب مبيخافش اللي بيحبه يبعد عنه. مبيفكرش ان لو حبيبه سابه هينهار وحياته هتبقي ناقصة…. اللي بيحب مش بيغمي عينيه عن عيوب اللي بيحبه ويقول معلش علشان مفْضلش لوحدي …علشان يفضل معايا هستحمل.
الحب يعني متبقاش مع اي حد والسلام…..الحب يعني تكون عايز الشخص بالذات. هو او هي وبس.

اللي بيحب بيبقي شايف وحابب ومستوعب ومحتوي عيوب اللي ادامه.

لو قلبك سعيد ومتسدده احتياجاته؟ .
لو انت لامس حتة الرضا جواك ؟……لو سعادتك طالعة من جواك؟ ساعتها هبك حيبقى اضافة ليك مش سد خانة .

إضافة تساعدك تبقي حد احسن وتخرج احسن ما فيك…. إضافة حلوة صحيح…..بس لو اختفت مش هتنقص حته لانك اصلا مكتفي بنفسك.

ساعتها اختيار قلبك هيبقى عن غناوة…. قلبك هيحط رجل علي رجل ومش حيقبل بالقليل و مش هيقبل تنازلات. قلبك مش هيبقى

نرجع تاني للموضوع الاهم. طيب ازاي هسدد احتياجي ده….. إزاي مش هبقي عامل زي المكنسة بشفط اي مشاعر ولو حتي مزيفة بتتحط في طريقي؟ ازاي حتونس بنفسي؟.

اهي دي بالذات مينفعش فيها كلام ولا نصايح تتقالك لانها تجربة شخصية جدا.

كل واحد عارف هو هيعمل كده إزاي لإن كتير بنسمع كلام وبيعجبنا ونقتنع بيه بس مبيبقاش عندنا الاستعداد ولا الرغبة ولا حتي القدرة اننا نطبقه لإنها مجرد معرفة مش إدراك حقيقي جاي من جواك ومستعد تطبقه علي حياتك.

عن admin

شاهد أيضاً

الإعلامية كريمة أبو العينين تكتب.. وكان ليه..!!!

عشرون عاما بعد موته وهو لاينسى لحظة حضور ملك الموت وترجيه له بان يتركه للحياة …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *