عِشرة بوابتك للحياه
ناس كتير لما بتسيب او بتتساب من حد بتحبه بيختبروا مشاعر وجع كبيره ….ناس وصفت الوجع ده في شدته كأن زيه زي ما يكون حد عزيز عليهم مات.
بس يا ترى الوجع الشديد ده بيبقى دايما سببه هو افتقادهم للشخص ده او زعل على غيابه ولا فيه أسباب تانيه بتزود من شده الألم ده وبتأخر التعافي.؟؟.
البني آدمين مولودين برغبات فطرية واحتياجات علشان تساعدهم على البقاء و التطور ….فيه رغبات فسيولوجية ( زي الأكل والشرب والجنس وغيرهم)
فيه احتياجات نفسية ( زي الحاجه للانتماء والتشجيع والاهتمام …..والحاجه في الحب ) .
الإحتياج انك تتحب وانك تشوف نفسك محبوب في عيون اللي حواليك وخصوصا في عيون حبيبك.
اوقات الوجع الشديد بيبقى سببه اننا بنحس اننا خلاص مش هنحس الأحساس ده تاني….جوانا حنين لفكره ان يا نتشاف وان تحب. اوقات مبنحسش بوجع علشان الشخص اللي مشي لكن علشان الإحساس اللي كان بيوصلهولنا.
ولو انت واحد/ه مبيحبش نفسه كفايه وعلشان زي ما اتفقنا ان احتياج انك تتحب ده فطري واساسي جوانا…فانت كمان كنت بتستخدم الشخص ده والإحساس اللي بيدهولك علشان تملى بيه الفراغ اللي حاسه جواك وطبعا الفراغ ده بيرجع تاني بعد ما بيمشي وده بيضاعف الوجع جواك..
لما الدنيا تقفل في عينيك اوي وتبدأ مشاعر الحنين جواك تعلى ….عايزاك تفتكر السبب اللي خلاكوا تسيبوا بعض؟؟؟ تراجع علاقتك معاه وتسأل نفسك ….هو انا كنت فعلا مبسوط ومرتاح جوه العلاقه وبحب الشخص ده حقيقي؟؟
ولا انا كنت مكمل علشان عايز احس اني حد اتحب وعايز احس اني استاهل الحب ده….هل هو اللي واحشني؟؟
ولا احساس اني مميز في عينه هو اللي انا مفتقده؟؟.
