عِشرة بوابتك للحياه
أحيانا بنقرأ كلام بشكل عشوائي لكن بنلاقيه بيلمس حاجه جوانا ومن اكتر الكلام اللى هنلاقيه بيمس اغلبيتنا الكلام اللى اتقال عن العشم على أحدى صفحات شبكة السوشيال ميديا “ايقاظ الحياة”
” العشم ” في تعريفه ..هو ان حضرتك بكل سذاجه .. وبدون اي اسباب منطقيه .. تنجذب لشخص معين .. وتقنع نفسك انك بقيت حاجه كبيره ومهمه عنده .. وتبني احلام وطموحات مبالغ فيها .. عن دوره الاسطوري في دعمك واسعادك
وبناء على الاندفاع الاحمق ده .. بتدي امتيازات وصلاحيات للشخص ده عليك .. تمنحه ثقه لا محدوده .. وتبدا تفتحله كل خبايا روحك .. لحد ما يتمكن منك تماما
فتكون النتيجه الحتميه ان الشخص ده يخذلك بعد فتره من الوقت .. وتمر بتجربه عصيبه من الاحباط ..تخرج منها وانت مكسور .. وفاقد الثقه في نفسك .. وفي كل اللي حواليك
فتبدأ تعاقب نفسك على تهورها .. فتحرمها من الاقتراب من اي حد .. وتتقوقع .. وتدخل في عالم من العزله
وتيجي مرحله بعدها تعاقب فيها اي حد يحاول يقرب منك .. وتتحول لشخص عنيف وجاف .. ومع مرور الوقت .. تنفض كل الناس من حواليك .. وتبدا تشعر بمدى بشاعه الوحده
لحد ما تيجي المرحله الاخيره.. وتضعف مره تانيه .. وتنجذب بنفس السذاجه لشخص تاني .. وتبدا تتعشم فيه من جديد .. وتعيد نفس تجربة ” العشم ” المريره
طب ايه الحل عشان نخلص من المأساه دي ؟
الحل ببساطه .. انك تبطل اندفاع وتعقل وتفهم الحقائق اللي جايه دي :
– كل الناس بتكون رائعه جدا في البدايات .. فمن فضلك فخد وقتك في الحكم على الناس .. احنا مش مستعجلين
– اعرف ان عنصر الوقت لوحده مش كافي لتقييم شخص .. العبره دايما بالمواقف.. مش بالسنين
– اياك تثق في شخص صاحب منفعه او مصلحه معاك ..استنى لحد ما ياخد مصلحته .. وتعرف بعد كده هيعاملك ازاي
– مفيش حاجه اسمها ثقه كامله .. الكلام ده في قصص الاطفال فقط .. اياك تخلي اي شخص يتمكن منك بالكامل .. امنح الثقه بالتدريج .. ولحد المستوى اللي ما يشكلش اي خطوره على نفسك
– اكيد هتصادف ناس وحشه ..
وياما ناس هاتخذلك ..
فتوقع دايما السيء قبل الحلو ، وجهز نفسك عليه
– مش معنى ان حد خذلك ..
يبقى العالم كله ذئاب بشريه ..
ثق تماما ان لسه في ناس طيبين و راقيين ..
زي حضرتك
وفي النهايه .. اعرف القاعده الذهبيه ..
” مفيش حد يقدر يخذلك .. الا اذا كنت من البدايه خذلت نفسك بثقتك فيه “
