الرئيسية / غير مصنف / الدكتور محمد دياب يكتب: نظرية الفول بالزبده..!!

الدكتور محمد دياب يكتب: نظرية الفول بالزبده..!!

الدكتور محمد دياب يكتب: لاتغلقوا اذانكم وكلوا فول بالزبده..!!
يمكن ناس تشوف ان كلامى ده كلام مش مهم خالص لكن انا هحكيهولكم زى ما حصل معايا بالضبط و الحكم لكم.
عادة انا فطارى كل يوم عبارة عن توست سن و جبنة بدون ملح عدا يوم الجمعة بفطر فول ….
و طبيعى زى كل يوم جمعة طلبت طبق فول بالزيت زى ما انا متعود آكل الفول من أكثر من أربعين سنة و شايف انه اجمل طريقة ممكن تاكل بيها الفول و أن كل الطرق التانية وحشة و مش مناسبة لذوقى ….
لكن المرة دى اللى جايب الفول قال لى انا هعمله لك بالزبدة …قلتله لا خاااالص … قال لى جرب الاول ولو معجبكش هجيبلك الفول بالزيت زى ما بتحبه ….
و فعلا جاب فول بالزبدة و انا بحاول آكل مجاملة و حكمت من قبل ما أدوقه انه وحش و أنه مش مناسب ليا لكن اول ما دقته حبيته … و اكتشفت انى كنت قافل ودانى و محاولتش اسمع رأى انسان تانى من أربعين سنة …
طبعا انا مقصدش الفول فى البوست ده لكنى اكتشفت بعد الزمن الطويل
÷ أن قدرتى على تقبل الرأى الآخر و ذوق الآخر و احساس الآخر قليلة …
و اكتشفت أن حياتى مليانة تابوهات أرفض انى اغيرها أو حتى اجرب غيرها ….
و كانت النتيجة فى الآخر انى سجنت نفسى وسط مجموعة من الإجراءات و الآراء بالضبط زى واحد عاش فى غرفة واحدة طول عمره و سايب باقى الشقة لأنه فاكر ان راحته فى الغرفة دى بس وأنه مش هيستريح فى باقى الشقة مع أنه مجربش ….
و رسالتى لكم النهاردة ….اسمعوا رأى غيركم بهدف الاستماع يمكن تلاقوا فيه حاجة مختلفة … يمكن تلاقوا فيه فائدة …رسالتى لكم النهاردة اوعوا تقفلوا على نفسكم و تعيشوا فى غرفة واحدة بس طول عمركم ….. رسالتى لكم النهاردة ببساطة كدة … دوقوا طبق الفول بكل أنواعه أكيد هتبقوا أسعد …

عن admin

شاهد أيضاً

الإعلامية كريمة أبو العينين تكتب.. وكان ليه..!!!

عشرون عاما بعد موته وهو لاينسى لحظة حضور ملك الموت وترجيه له بان يتركه للحياة …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *