عِشرة بوابتك للحياه
واحد زميلى بيقولى : انا مراتى مجرد انها عايشة معايا و شايفة طلباتى انا متأكد انها بتحبنى
هو انتوا ليه لازم تأكيد دايما على الحب
هو انا مش بدال عايش معاكِ و بلبى طلباتك
ليه ما تعتبروش دا حب ؟
قلت له : علشان احنا مختلفين
احنا كنساء احتياجاتنا العاطفية و النفسية كتير من الى حوالينا للاسف
الستات محتاجة حنان و عطف و دلع و تفهم و طبطبة و دعم و مشاركة و حاجات كتير من الى حواليها
الستات بتستمتع بالعلاقات
و اكتر حاجة بتسعدها فى حياتها لما تحس انها محبوبة و مسنودة
الرجالة غير
الرجالة بتستمتع اكتر بالانجازات
و حلاوة الانجاز لما يبقى بتاعه لوحده
بيستمتع اكتر بالاستقلالية و الكفاءة الشخصية
دا حتى العلاقات بالنسباله بتكون احد الانجازات
ربنا خلقنا كده علشان الامومة و الاسرة نجمعهم حوالينا
الست هى العامود الى بيتجمع حواليه الاسرة
علشان هى محتاجة دا و بتسعد بدا لما بتلاقيه
و بتحزن جدا لما تحس انها مش محبوبة و مش مسنودة
و الاسرة كمان محتاجين منها الحب و الاهتمام العطف و الحنية و الطبطبة و الاحتواء
و لما بتفتقد الحاجات دى للاسف ما بتعرفش تديها
و لو اديتها فى البداية من غير شحن ..الشحن بيخلص فى يوم ما و بتفقد قدرتها على العطاء المعنوى
و ممكن تستمر فى اداء المسئوليات و المهامات و العطاء المادى بس من غير روح و عاطفة و رحمة و حنية
بتتحول هى كمان الى رجل الانجازات
بتؤدى أداء من غير روح الانثى
هو ربنا خلقها كدة
لحكمة و هدف
لكن احنا عايزين نحولها الى ماكينة منتجة عملية و منجزة علشان نريح دماغنا
و النتيجة اجيال محرومة عاطفيا و نفسيا و عندهم اكتئاب و بيحبوا على نفسهم و بيدوروا على الحب الى محرومين منه بلهفة و شغف
و بيرموا نفسهم فى النار علشان يلاقوه
