الرئيسية / مقالات / الدكتورة دعاء راجح تكتب.. النرجسي والمطحون..!!

الدكتورة دعاء راجح تكتب.. النرجسي والمطحون..!!

الفرق بين الزوج النرجسى الخفى و الزوج المتواضع المطحون المُقَصّر ؟

كتر الكلام عن الشخصية النرجسية خلى “بعض” النساء تشوف أى زوج مش ماشى على مزاجها كأنه زوج نرجسي

و خلا “بعض” الرجال شايفين ان موضوع النرجسية دا مأفور أوى و مرفوض و عايشين دور الضحية و انهم غلابة و مطحونين فى مدعكة الحياة و ان دا هو سبب اهمالهم للزوجات

علشان كدة مهم نفرق بين الاتنين

النرجسى حاسس دايما انه يستحق التبجيل و التقدير و التعظيم و الاهتمام و الاشادة باعماله مهما كانت بسيطة

و لا يعترف بأحمال و مهام الآخرين و يستقل بيها

( انتى يعنى بتعملى ايه طول النهار )
و يعتبر مسئولياتهم استحقاق ليه
و دايما شايف ما يُقَدَم لايتناسب مع ما يستحق و ما يجب أن يُقَدم

المتواضع المطحون بيحس ان مراته شايله عنه كتير
و هى تستحق انها تتشال من على الارض شيل
و بيعترف بكدة و حاسس بيها فى “قرارة نفسه”
فى قلبه ” رحمة ” و بتصعب عليه
حتى لو مقصّر فى التعبير عن دا بالقول أو الفعل

النرجسى عايز يأنتخ فى الأجازات و أوقات الراحة بحجة انه من حقه يرتاح و لايرى الا احتياجات نفسه فقط

المتواضع المطحون بيريح فى الاجازات شوية و يبدأ يريح مراته شوية لانه حاسس بتعبها هى كمان
و بيبقى نفسه يبقى عنده وقت أو فلوس أو جهد زيادة علشان يشيل معاها و يريحها

النرجسى وقت الفراغ بيقضيه لنفسه و متعته و مزاجه فقط
المطحون المتواضع وقت الفراغ بيقضيه مع مراته وولاده و بيحس بيهم و عايش معاهم مشاكلهم ومخاوفهم
و من جواه حاسس بالتقصير معاهم

النرجسى كل تفكيره فى ولاده انهم عايزهم يحترموه و يقدروه و يعظموه و يعملوله كذا و كذا و كذا و يشيلوا عنه

المتواضع كل تفكيره انا اعمل لهم ايه علشان اريحهم و اسعدهم و يارب مكونش حمل عليهم لما أكبر

الخلاصة :

النرجسى مش بيحس الا بنفسه بس و جل تفكيره فى الاخرين هيعملوله ايه

المطحون المتواضع بيحس بنفسه و فى قلبه رحمة و تقدير للاخرين برده و بيفكر ياترى ممكن اعمل لهم ايه

و لا يبخل بجهد أو وقت أو فلوس متى تيسّر له ذلك

الاتنين ممكن يكونوا مطحونين فى الدنيا
بس فيه واحد شايف نفسه بس هو الى بيتعب و التانيين مش بيعملوا زى ما هو بيعمل

و واحد شايف تعبه و حاسس بتعب الآخرين و جهودهم و مقدّر من جواه حتى لو مقصّر فى التعبير عن ده

عن admin

شاهد أيضاً

الإعلامية كريمة أبو العينين تكتب.. وكان ليه..!!!

عشرون عاما بعد موته وهو لاينسى لحظة حضور ملك الموت وترجيه له بان يتركه للحياة …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *