عِشرة بوابتك للحياه
من اكتر الموضوعات الى بتعمل مشاكل فى العلاقات بين الناس موضوع الحدود الخاصة بكل شخصية
فيه ناس لما تتصاحب او تحب حد بتبقى عايزة تدخل فى حياته بدرجة كبيرة ..
يعنى نكون مع بعض أغلب الوقت
و لو مش مع بعض يبقى بنتكلم على الواتس اب
صحينا من النوم
دخلنا الحمام
فطرنا ايه
هنعمل ايه النهاردة
هنتغدى ايه
قابلنا مين و قلنا ايه
اشترينا ايه و من فين و بكام و شكله ايه و ماركة ايه
ايه الى حصل فى الشغل
مين زارنا النهاردة
بتكون حاسة ان من حقها تعرف كل حاجة بدال احنا اصحاب
و هى كمان بتتكلم على كل تفاصيل حياتها بانفتاح شديد
فيه ناس تانيةالعكس تماما
ما بتحبش تفتح حياتها كدة على البحرى
مابتحبش حد يعرف عنها كل حاجة كدة
بتحس ان دا فضول و حشرية
بتحب يبقى ليها خصوصية
و التواصل يبقى بحدود و مش كل ساعة و لا حتى كل يوم
بتكون مشكلة كبيرة لما الاتنين يتعرفوا او يصاحبوا او يحبوا بعض …بتكون مأساة
الشخصية المنفتحة بتتكلم كتير عن نفسها و حياتها و بتسأل كتير …
و دا ممكن يكون مبهر للشخصية المتحفظة فى البداية لانه شايف حاجة جديدة
و حد بيهتم بتفاصيله و بينفتح عليه و بيكون مقبل عليه
بس مع الوقت بيبدأ يزهق منها و من تدخلها و اسئلتها و تواصلها الكتير
و بيبدأ ينسحب شوية
او يخبى حاجات عنه شوية
او يطنش مكالمات او رسايل شوية
بيبقى عايز يشم نفسه لوحده شوية
فالتانى طبعا يتضايق و خاصة لو عمل حاجة من وراه …طب انت ماقلتش ليه ؟
و يقلق و يسأل هو فيه ايه و حصل ايه و بتبعد ليه ؟
و المتحفظ محرج يقوله انت زهقتنى و خايف على مشاعره
فيرجع يسمح بالتواصل المتواصل تانى علشان يطمنه ان مفيش حاجة
لحد ما يزهق تانى
و يبدأ يبعد تانى
و هكذا
بتكون علاقة زى سلك الزنبرك تقرب اوى اوى و بعدين تبعد حبة
بتكون علاقة مجهدة جدا للطرفين
الاتنين ممكن يكونوا بيحبوا بعض حقيقى …بس كل واحد مختلف فى حدوده و مساحاته
واحد مُختَرق تماما و عايز يخترق حدود الاخر و يدخل فيها
و التانى متحفظ و متضايق من اختراقه لحياته كدة
و كمان معندوش اهتمام انه يعرف تفاصيل فى حياة المنفتح هو حاسس ان مالهاش لازمة يعرفها
العلاقات علشان تنجح مهم جدا نحترم الحدود دى
و نفهم نفسنا
و نفهّم الاخر حدودنا
الخوف من انى احرجه مش هيحل المشكلة دا هيعقدها اكتر
انا بطمنه انى بحبك و حريصة على العلاقة بيننا و مقدر حاجته للمشاركة الدائمة
بس انا متعود مثلا انى اخرج اشترى حاجاتى لوحدى من زمان فانا اعتذر مش هقدر اخرج معاك نشترى …و لو انت محتاجنى انزل اشترى معاك انا تحت امرك طبعا
او انا متعود انى انام بدرى فمش هقدر اسهر معاك على الواتس اب …بس الصبح هتلاقينى معاك
او انا متعود انى اذاكر لوحدى فمش هقدر اذاكر معاك باستمرار …لو احتجت حاجة فى اى وقت انا تحت امرك
بمنتهى الوضوح و الادب و الذوق و التقدير لحبه و احتياجه و التقدير لاحتياجك انت كمان لحدود راحتك
بدل من انك تبعد شوية فيقلق فتقرب تانى فتزهق فتبعد شوية و هكذا
و الناس برده الى بتحب العلاقات تبقى متداخلة اوى كدة مهم اوى تحترم حدود الاخرين و ما تقيمش حب الاخرين ليك بناء على مدى انفتاحهم عليها و اهتمامهم بكل تفاصيلك
فيه ناس بتحب تكون لوحدها اكتر و دا طبيعى فى البشرية
نسبتهم حوالى ٢٠٪من البشرية
و زادوا اوى كمان مع ظهور الموبيلات
و هيزيدوا جدا فى الاجيال الجديدة
فى علاقاتك شوف درجة انفتاحك و انفتاح الاخر عليك …و ظبّط الحدود الى تريح التانى مش الى تريحك انت بس
و دور على حد تانى شبهك ممكن تتداخلوا مع بعضكم براحتكم
